SONIARTE, lo ciclo de teatro que Trueque organicé fa dos añadas, tornará este 2026.
Con un cartel de compañías profesionals y otras aficionadas, dende junio ta la santmigalada de 2024 disfrutemos de obras de autor como Mal pero Bien, de Alfonso Pablo, de clasicos como La Casa de Bernarda Alba con Oroel Teatro de Chaca y de propuestas infantils con Perdidas por el Teatro de la compañía Kinser u obras recients como Toc, toc con la Agrupación Teatral de Sabiñanigo.
En verano nos visité la compañía francesa Blimunda, de Borce, con un recital musicau de poemas y un taller de RAP, y lo grupo cheso, Trueque, abrié y cerré lo festival con Tres sombreros de copa.
Con l’aduya de lo Concello y, sobre todo, con lo respaldo de tanto publico que implié la sala en todas las representacions, se podié financiar un festival que nos acerca historias y arte, que nos entretiene y nos fa pensar a la vez.
Lo programa pa este 2026, agún sin estar definitivo, contará con otra obra de Trueque. Y nos visitarán tamién los grupos Blimunda de Borce y Kinser, con una nueva obra pa publico familiar. Ya de santmigalada, acudirá la compañía Zootropo con la obra ¿Está Gila? Y Javier Aranda con la obra Vida.
