Lo zaguer enero estié lo cabo d’año de D. José Mª Enguita Utrilla, catedratico de la Universidad de Zaragoza, que falleceba lo 14 d’enero de 2025. Lo conocié gracias a Bisas de lo Subordán y a Rosario Ustáriz, pos ellos se facieron amigos cuando Enguita venié en 1990 convidau por la Casa la Villa pa presentar la Gramatica de lo Cheso de José Lera y Juan José Lagraba.
D’ixe momento escribiba lo profesor en la Presentación de lo libro de la obra de Rosario, Miquetas de l’Alma, “me agradó charlar con esta mujer de porte elegante y trato amable, de la que ya conocía algunos poemas que, en verdad, me habían impresionado”. Ixa impresión se fue agrandando con los nuevos escritos de R. Ustáriz y estié tal que, sin de lo suyo triballo y dedicación, no hésenos podiu editar los tres libros sobre la suya obra.
Antis que ixo facié un triballo de lo poema A una rosa mía pa unas conferencias, dimpués lo publicaría en la revista de lo Archivo de Filología Aragonesa (cf. Enguita 1996-1997) y lo analizaría tamién en la suya conferencia sobre “Localismo, costumbrismo y notas más generales en algunos textos recientes en fabla chesa”, que impartié en las «Jornadas del V Curso sobre Lengua y Literatura en Aragón. Localismo, costumbrismo y literatura popular», organizadas por la Institución Fernando el Católico.
Pa publicar Miquetas de l’Alma, que replegaba toda la obra de Rosario hasta d’allora, José Mª Enguita enguisé lo índice, facié correccions gramaticals y nos aduyé con la presentación en Echo un 12 de diciembre de 2006.
Anque cada vez con mas achaques, Rosario siguié escribindo bel verso y no pocas prosas en distintos discursos por los muitos reconocimientos que recibié en ixos años.
Cuando Rosario morié en agosto de 2009, empecipiemos a triballar en lo segundo libro: Entre amigos, zagueras añadas, que replegaba ixa obra postuma, y lo presentemos en lo cabo d’año, en agosto 2010, en lo marco de unas Chornadas sobre la Val d’Echo en la obra poética de Rosario Ustáriz. Pa ixos días, Enguita se trayé a cuatro compañers de lo departamento de Filolochia de la Universidat de Zaragoza, los profesors Rosa Castañer, Mª Antonia Martín Zorraquino, Mª Luisa Arnal y Vicente Lagüens, que chunto con amigos de la Val y lo president de lo Estudio de Filolochia Aragonesa, Manuel Castan, impartiemos una serie de conferencias y compartiemos parolas en lo afán de resaltar lo güen fer de Rosario filando versos.
Sería en 2020 cuando por fin se podieron publicar ixas conferencias, que zarran la trilochía de libros de la obra de Rosario. Todo ixe tesoro lingüistico y la difusión que li se ha dau no hese estau posible sin este profesor y amigo que tanto aimaba la nuestra lengua.
Un honor pa lo cheso, la nuestra fabla, pos José Mª yera doctor en Filosofía y Letras, en Filolochía romanica. Colaboré con muitas universidaz, tamién europeas e hispanoamericanas, y desarrollé perén un denso quefer d’investigación sobre lo español de América y sobre lingüística aragonesa. Organicé tamién dos encuentros sobre lenguas y culturas pirenaicas en Benás, colaboré en todo tipo de chornadas y premios literarios por Aragón, estié consellero de la Institución Fernando el Católico, con la que organicé muitos cursos de temas aragoneses, estié secretario y subdirector de lo Archivo de Filología Aragonesa y mainate de lo grupo de Investigación ARALEX pa lo estudio de la realidat lingüística aragonesa en lo pasau y en lo present. Con la Universidat de Verano de Chaca impartié clases en los Cursos generales de lengua española para extranjeros y en los Cursos de formación de profesores de español como lengua extranjera, y die muitas conferencias en universidaz de toda España y en muitos países d’Europa y América latina.
En la suya casa de Chaca pasaba los veranos y lo fin d’año. Dende allí feba muitas escapadas a chintar migas en la Borda Chiquín u a visitar a Rosario Ustáriz. La suya perdida ha dixau una pena profunda en los amigos academicos que li dedican, con distintos escritos, lo zaguer libro de la institución Fernando el Católico.
