Un año más, celebramos lo 21 de febrero, Día Internacional de la Lengua Materna, achuntándonos en distintos actos pa charrar mas y millor lo cheso, fendo remeranza de palabras y esprisións que tasament empleamos, reliyendo a los nuestros autors, mirando de charrar y charrar y charrar y que nos escuiten los críos y crías.
Lo viernes 20 nos achuntemos una trentena de personas pa escuitar no solo cheso, tamién ansotano, catalán, valenciano, gallego, euskera, francés y hasta quechua. Todos vecinos d’Echo de distintas redoladas, variedat de lenguas que son muestra de riqueza cultural. Antis pasiemos una miqueta de Cruz de Cristiano ta plaza la Fuent. 10 poemas de autors chesos nos acompanian dende lo puent viello hasta lo parque pa remerar costumbres y feitos d’antismas. Tamién puyando ta Ciresa podemos conocer en verso la suya guallarda historia.
Una ucena de mesaches y mesachas lieron los versos pa la luna que escribiba Vitoria Nicolás y li facieron un mural. Y lo sabado en la escuela podiemos saber mas de las lenguas d’Aragón de la mano de Angel Vergara y Mª José Menal de La Chaminera y se proyecté lo documental de Silvia Orós Ixigoleta y bordón.
Repitiemos los listaus de palabras raras y beroyas, pa resaltar la lengua tan polida y variada que hemos. A lo cierre de esta redacción, no se sabe agún cuals son las ganadoras.
