Fa dos semanas dicíbanos adios en Urdués a Don Constancio. Lo que estié y conoceban en toda la Chacetania como “lo practicante d’Echo” nacié en Urdués un 12 de Diciembre de 1942 en Casa Calvo, fillo d’Andrés Calvo, vecino d’Urdués, y Serafina Eito, que yera d’Embún.
Chunto con los suyos hermanos Miguel y Luís y las hermanas Carmen y Concha, estudié en la escuela publica d’Urdués. Empecipié la vida laboral con lo Concello d’Echo u con la construcción de la carretera d’Urdués, entre otros triballos, y a los 19 años ingresé en l’Academia de Formación de la Guardia Civil en Barcelona.
Estudié entre Barcelona, San Sebastián y Londres (ta do se’n fue a triballar pa aprender inglés), bachillerato, taquigrafía y mas tardi una diplomatura en “Medicina Natural y Botánica aplicada a la Medicina” y “Ayudante Técnico Sanitario”.
En San Sebastián aprobé la oposición pa enfermero en l’Hospital de Nuestra Señora de Aránzazu y allí conoce a la que sería la suya muller, Maria Pilar Pérez, enfermera militar, telefonista y librera, con qui habié a los tres fillos, Javier, Ismael y Andrés, que más tardi serían los suyos colaboradors en los libros que publiqué.
Ascape demandé lo traslado ta Echo, en do se i quedé como practicante hasta que se retiré a los 70 años en 2012. En ixos 40 años de servicio pa los vecinos de las vals d’Ansó, Echo, Aragüés del Puerto y Jasa y hasta Santa Cilia y Somanés, fue fendo aplego de muita información, primero sobre plantas medicinals y remedios naturals tradicionals, y dimpués sobre tradicions, oficios y cultura en cheneral, que li permitirá atrapaciar una colección de plantas medicinals particular y otra a demanda de lo Gubierno de Aragón que levará ta la Expo de Sevilla de 1992.
Este afán por la suya tierra y las chents que aquí viven fará que colabore con diferentes organismos e institucions como l’Instituto Pirenaico de Ecolochía de Chaca, con qui publicará Plantas medicinales del Pirineo aragonés y otras tierras oscenses.
Tamién ixe amor por la suya tierra lo rempuxé a presentarse y estar eslichiu como lo primer alcalde d’Echo de la democracia, (1979-1983).
En ixe tiempo organicé las Chornadas culturals de la Val d’Echo, que trayeron profesors universitarios, escritors, artistas y demás personas relacionadas con l’arte y la cultura.
Anque estas chornadas no habieron continuidat por distintas causas, lugo promovería con l’Asociación Turística de la Val unas chornadas sobre plantas medicinals los meses de junio que trayeron a curiosos y emprendedors, a qui informaba sobre las distintas plantas medicinals con salidas de campo pa identificar-las.
Dende que se retiré se dediqué a publicar toda la información replegada, tanto de medicina natural como en las suyas salidas por lo mont, tanto de tradicións y cultura cheneral como, en los zaguers años, sobre la historia de las Vals Occidentals. Asinas, se pueden trobar los suyos libros:
- Paseos y excursiones por los Valles Occidentales
- Paseos y excursiones por La Val d’Aragüés-Jasa, La Val d’Aisa, La Val de Borau.
- Paseos y excursiones por La Val de Ansó-Fago
- Paseos y excursiones por La Val d’Echo
- Valle de Hecho. Estudio Antropológico y Etnológico
Lo suyo interés porque toda la información de la que facié aplego a lo largo de la suya vida plegase y se quedase en esta tierra dixé inédita la suya obra más larguiza, “Estudio Arqueológico de los despoblados del Primitivo Aragón”, ya que tasament antis de lo suyo fallecimiento este 5 de Febrero de 2026, ib’yera en parola con la Diputación de Uesca y los Concellos d’estas vals pa que en ixe coste d’edición se contase con regalar un exemplar de este triballo a cada casa (vecinos) de cada municipio. Como faría en su día con los vecinos de la Val d’Echo con lo libro de lo Estudio Antropológico y Etnológico.
Toda una vida de triballo, estudio y disfrute de la suya tierra, convivindo con los vecinos, fablando cada tarde en l’hogar de lo chubilau, en las plazas de los lugars, en los campos, pallars, bordas, tierras… de cada pueblo con los mas mayors de cada lugar, replegando tanta sabiduría, experiencias y conocimientos.
Heba muito apego por lo mont y los suyos recursos, recorrié cada centímetro de todos los puertos, vals, selvas, pardinas… solo u en compaña con chents d’Ansó, Fago, Echo, Ciresa, Urdués, Aragüés, Jasa, Embún, Xavierregai, Santa Cilia, Somanés, Santa Engracia, Berdún, Biniés, Villarreal, Majones… entre otros que, de siguras, lo ven a itar a faltar.
