Lo 6 de marzo de 2023 escuité en Radio Chaca que s’heba moriu don Aquilino Jorge Echevarría, lo chiquet de Puchardo, de 71 años, casau con una filla de lo Patatero de Chaca y padre de dos fillos y una filla. Yo chugué con Aquilino en la escuela de parvulos y lo ité muito a faltar cuando lo se levé un tiempo la familia de la suya mai enta Chaca, sin yo entender lo por qué. Con él se morié lo zaguero fillo de Puchardo, que no lo apelliu.
Valeriano Jorge Pérez (de mote «Puchardo») nacié en Berdún lo 9 de diciembre de 1910, fillo de Fidela y Antonio. Hermanos con María, viviban con la suya madre en lo furno en do ye agora la terraza de casa Lo Pico, entre la plazoleta Sant Miguel y lo Muret, cara cara lo pallar de Vicente (hoi de Farol), a calza regüelta con otros calés que tamién viviban en lo lugar, entre ellos José Echevarría (de mote «el Ronquillo») y Bibiana Avadiano con los suyos seis fillos: Sabino, Pilar, Petra, Eugenia, Amada y Nieves. Antis más heban estau entre Santa Engracia y Xabierregai hasta que atureron en Echo. Chitaniaban con la verga de los verguerals de la glera de lo río, enxergando cestas, cabazos y toda clase de achiperres de vimbre que heba a menester la chent chesa. Tamién de l’apañanza de ballenas cluxidas de los batiaguas y d’estañar las perolas foradadas de las dueñas, en pagas de bel cuartot que lis daban en las casas y pedigoniando bel troz de chancarrón rancio, amás de ropa viella.
Puchardo yera estau casau con Pilar, filla de lo Ronquillo, una chitana rubia, polida y muito mas choven que él, que, ya allora, heba arradigau lo vicio de beber y li aganaba masiau cómo se feban los críos. N’heban tres: Angelito, Mariano y Aquilino (algunos li s’heban moriu).
Tamién viviba en lo furno otra parella con carramallos. Él, un hombre bien plantau clamau Juaquín, creyo que yera pamplonés. A ella, que se clamaba Irene, en Echo la clamaban «la Lagañosa» por haber los güellos ribitiaus y lagañosos.
Un día acontecié que Pilar y lo mariu de la Lagañosa dieron güena escandalera, jopando chuntos ta Navarra. Muit gran debié estar la falaguera que li die a Pilar por lo navarro pa abandonar a los fillos chicotons dixando-los solos con lo pai, cosa que dinguno de los suyos li’n perdoné. Lo mainate cañí que mandaba allora por la redolada lis apliqué la lei de la chitanería, desarradigando-los, y nunca más podieron tornar enta Echo.
Puchardo se quedé solo y pensaroso en Echo con los tres criachos chiquez y la Lagañosa marché ta Biescas con los cinco u seis suyos. Diz que Juaquín yera estau muit acharoso de cualsiquiera que mirase a Pilar y, sigún contaba Petra, heban por ixo güenas piloteras, dando-li a ormino güenos samantos y fendo-li no sé si una oncena de churumbels mas.
A María, güena cestera, creyo que la heba dixada l’hombre feba muito tiempo con dos fillas, Araceli y Antonia y, dimpués d’haber criau a las suyas, s’habié que fer cargo de los de su hermano Puchardo, que se die a lo bebercio agún mas y levé mala vida. Mas d’una vez, bel mesache de lo lugar lo acompañé hasta la caseta en do viviban en la Cuesta, por no trobar él lo camino de tan apifau que iba.
Araceli se casé con José (de mote «el Luna»), hermano de Lorenzo lo mariu de Petra, y ne habieron cuatro, de crianzons: Aguedeta, Joselet, Julieta y Teresa, que se crieron a la vez que los de su tío-güelo Puchardo, pos yeran de un tiempo. Y estieron todos en la escuela d’Echo con los escolanos y escolanas que íbanos tamién. No he guipau enjamás unas trenas mas pretas y millor peinadas que las d’ellas, no se despeinaban ni un pelo, diz que la suya madre lis ne untaba con aceite y no m’estrañaría por lo lustre que luciban. Con Julieta, anque me levaba dos u tres años mas, hébanos muit güena amistanza y yo la apreciaba muito. Fo una especie de recordanza de cuando se comulgué ella sola de cría en la ilesia, con lo traje de Gloria, la filla de doña Carmen, la mayestra, y dimpués de fer-li chocolín desfeito. No nos hemos tornau a vier y, anque dimpués de tantos años si la trobase no la conocese a lo vier-la, sí la conocería por la voz. Hoi lo informante me diz que ya s’ha moriu. Qué duelo que m’ha feito!
Pa Santa Agueda diz que las amigas escolanas de Aguedeta s’achuntaban con ella en lo furno en do agún viviban y lo celebraban brendando, levando cada una algo de lo matacochín y minchando-lo-se todas chuntas. Y Antonia también se casé, pero más ta debant, con Paulino, fillo de Julio lo esquirador.
José, güen triballador, raro allora en los de la suya casta*, triballaba a chornal en lo que saliba, fendo sociedat con los hombres de lo lugar chugando a pilota en la plaza (yera estau güen pilotaire) y a la baralla los domingos en lo café de Zapatero. Me sona que estando mainate don Paco, lo concello li aduyé a fer-se una caseta mas gran de la que s’heba feito él en primeras en la Cuesta, pa vivir toda la familia, pero sin agua ni escusau, y tan encalfexius que tasament podeban calar-se’n los trece mas parients. Cuando puyábanos chugando y nos acercábanos a vier-los, dando-lis la murga, nunca nos facieron un estraño. Nos daba muito miedo la güela Fidela, que yera impedida y con lo mal de San Vito, perene con tembletas.
Las casetas
Se facieron en Echo dos casetas en la Cuesta. La más viella se i veye en esta foto, a una sola agua. José se facié, ya más gran y blanquiada, la que viemos en la foto d’entrada de lo escrito.
Tamién por do lo pallar de Gollins viviba la familia chitana de Julio lo esquirador, que esquiraba a las caballerías y abríos, con los suyos fillos Sebastián, Paulino y Julieta. No sé si primero estieron en Echo y dimpués marcheron ta Embún, en do habieron casa, puyando de cuando en vez a esquirar y estando-se allora ¿en la Tellería? Cuando baxaban los mesaches d’Echo bicicletiando pa la fiesta de los napos, lis alzaban la becicleta en casa suya, fendo-lis muito causo. Lo fillo mayor vivié dimpués con la muller por do se puya ta lo pallar d’Agustín, que yera estada callada, limpia y muit formal, y dos mesaches, Mateo y Alberto, triballando los zagals hasta que se retireron con los de Uvero en Puent de la Reina.
Marcheron dimpués de muitos años todos enta Chaca y allí se morieron los viellos. Los chóvens que no heban triballo, replegando fruita y verdura de temporada por la redoldancia de Lérida, u de vendemiadors en la santmigalada; los mas grans, con los caminers cargando grava en los cambions por la carretera entre Chaca y Echo. Todos marideron u s’emparelleron millor u pior, menos Angelito, lo mayor de Puchardo («Puchi», como lo clamaban en la replega de la fruita), lo mas guapo (yo lo trobaba paiciu a lo actor Gary Cooper), que se pasaba la vida empifolau chupiterno largo en un banco de la Plaza Biscós de Chaca y se morié soltero. Diz que se cremé en una caseta que se die a fuego con él dentro en Puent de la Reina.
Estieron chitanos honraus, de fiar, anque guardásenos todos, ellos y nusotros, las distancias por si alcaso, pos yéranos racistas y ellos tanto u más. Viviban aparti sin calar-se en la vida ni en los feitos de los payos, siguindo con las suyas leis y costumbres tan arradigadas como immemorials. Tampoco las fillas s’achuntaban con nusotras si no yera en la escuela. Ni a chugar por las carreras, ni a chagandiar domingos ni días de fiesta, ni sisquiera pa la Fiesta. Su padre José, que se feba rispetar por todos y yera siempre a las vistas, creyo que no las dixaba baxar si no yera pa algo preciso. U… sería que no ignoraban y pon de pena pasaban de la nuestra traza de vivir? En la suya cultura heban la propia, ni pior ni millor que la nuestra.
Cuantas veces m’he alcordau d’ellos, pos los trobabas a ormino por lo ambito de lo lugar! Cuando pienso con ignoranza en la Cuesta, que yera lo mont d’astí pa chugar, un mundo aparti meyo fadau pa mí, sobre todo en lo pinar, y por do, en lo güen tiempo, fébanos excursions emocionantes, (tamién pa mí), con las amigas d’allora, los remero cutio.
(Nomás me queda lo reconcomio de saber quí yera la famosa chitana Serapia, que por lo visto vivié en Echo antis de las familias que nombro. Todo lo mundo la ha sentiu nombrar y dinguno sabe quí yera estada.)
* F. Sánchez Dragó en lo suyo ensayo Gárgoris y Habidis diz que: “Ciertas especulaciones vagamente talmúdicas dicen: que los gitanos serían hijos del propio Adán y una primera esposa anterior a Eva. La única estirpe humana no contaminada por el pecado original. Predilectos de Iahvé. Ninguna maldición les obliga a sudar el pan”
