Menos mal que en la editorial d’aquel zaguer numero en 2024 ya dicíbanos que a lo millor podeba haber una secuela dichital de la revista. Porque dimpués de una sentida despedida en aquel numero 40, solo se’n son pasaus 24 meses, dos años, pa que hayamos Bisas de lo Subordán otra vez. No en las zarpas, pero si en l’ordenador. Bueno, tamién en las manos si prexinamos que muitos la vos mirarez en lo móbil.
Nos feba duelo no poder siguir contando tantas historias, mirar d’explicotiar asuntos de la vida de hoi en la Val que a nusotros tamién nos preocupan u interesan, dixar constancia de lo que se fa, cómo y por qué…
Y lo cheso, la nuestra lengua, siempre. De siguras meterez caras raras si vos claman l’atención palabras escritas asinas: hoi, muit, hibierno… U si viemos una «r» en plurals que en cheso NO se pronuncia: zaguers /zagués/, navaters /nabatés/, compañers /compañés/… U «t», que, lo mismo, tampoco dicimos al charrar y tampoco hemos que nombrar-las anque sigan escritas: chent, puent, santmigalada, tasament…
Ye que imos a escribir como lo manda la norma ortográfica, esta vez sí, ya publicada en lo Boletín d’Aragón en 2023. Ya i serez familiarizaus con ella, pos Pepe Lera la emplea dende que s’aprobé. Sigue estando cheso y no hemos que pronunciar ixas letras fablando, pero a lo escribir, todas las variedaz de l’aragonés, como lo español y todas las lenguas que se precien d’estarlo, han una norma. Y l’aragonés ye una lengua.
Lo goyo y encanto que heba una revista papel…, pos igual ya no será lo mismo. Pero femos confianza que ascape vos irez fendo con la rutina dichital. Las seccions son las mismas: CHENTS pa personas y personaches, HEMOS NOTICIA DE pa reportaches de mayor enjundia, MIQUETAS pa las noticias curtas, ANTIS MAS pa escritos de lo que yera la vida denantis, FOLLAS LITERARIAS pa lo que lo mismo nombre indica, ARTE conCIENCIA sustituye a Fablando de Arte pero será tamién un escaparate pa una mirada artística de la naturaleza, ZUMAQUETE seguirá estando una lición, una pensada, un repaso a lo cheso…
De momento hemos dixau en un caxón los Pasatiempos, las Endreceras, las Chinta, las fichas de flors y animals… Veremos a mirar, lo bueno de lo dichital ye que todo se puede ir retocando.
Confiamos en que vos agane y ta lo correu electrónico nos podez inviar los escritos que vos parezcan pa publicar-los, tamién dar ideas de cosas que querez que salgan u, si no vos atriviz a escribir, inviar datos y fotos pa que montemos nusotros la noticia. Gracias a lo Concello por darnos lo caucarré que yera menester pa lo diseño web ¡y a todos por siguir allí!
