A las puertas de lo 8 de marzo, Día Internacional de la Muller, femos aplego de unas cuantas frases y expresions que trasminan lo machismo que empapaba la sociedá hasta fa bien poquet (y que agún no se’n ye iu del todo).
Mala nuey y parir filla (Resultar inutils los esfuerzos que s’han feito pa consiguir algo)
Coxera de can y mal de muller (Se diz de lo que no ha importancia)
Lo hemos todo, la moza borracha y lo vino en la cuba (Se diz cuando alguno se quexa d’un gasto que li parez muito)
Qué rancaderas ha ixa mesacha (Se diz de la muller con caderas bien formadas)
Lo trafago Antillón, siete mullers pa un peón y li daban la comida sin sal. (Se diz de qui s’afana muito en fer las cosas y las acaba mal)
Hemos un refrán cheso que caye a l’ pelo pa los machistas que las diciban u las dicen: A lo bestia y mal fablau, no darlo por escuitau!
Y agora, como sinonimos de «Bestia» pa que podaz eslichir: Aborregáu, Abrío, Acémila, Alarbe, Animalaz, Brutaz, Cernícalo, Salvache, Troz de xo!, Zanguango…
Yo me i quedo con «Troz de xo» (!Pedazo de animal!)
A lo troz de xo mal fablau, no darlo por escuitau!
Pos sí. Equilicuá.
