Chornadas científicas, escape room, micro teatro, lecturas, conciertos… Casa Gastón, gracias a la generosidat de Mari Carmen Gascón, se’n ye tornada lo que Emilio hese queríu, un puesto en do se troban la cultura, la ciencia, lo conocimiento…
Lo fogaril con las cadieras y todos los archiperres que Emilio coleccioné a lo largo de los años nos charran de lo suyo respeto por la cultura chesa y nos convidan a conversar, a estar de parola chunto ta lo fuego fablando de lo mundo, de las artes, declamando poesía, cantando… Los estantes a caramullo de libros y documentos legau de los Gastón, nos animan a aprender, a haber curiosidat, a querer saber. Las esculturas de Emilio nos remeran lo suyo arte, lo suyo entusiamo. Entre ixas parets no cale otra que querer sintirse uno millor persona. Y las propuestas de Mari Carmen nos aduyan en ixe afán.
Todo empecipié con un concierto de lo tenor Pablo Puértolas con Javier Marín en lo piano. En lo balcón tamién se apreciaba un traje cheso de calzón, lo que a lo millor levé lo tenor Fleta cuando rodaba la película Miguelón en la Val. Y de Fleta y en homenache a él estieron los cancións cantadas por lo tenor.
Lugo vendría un escape Room, presentacións de libros y charradas con los suyos autors, divulgación científica con lo grupo Faraday…
Y convidaus siempre a participar y goyarla, toda la vecindat, la cachimalla de la escuela y los artistas de las Residencias Lo Mon Contemporáneo, que tamién troban en la casa una fuent d’inspiración.
