Esta primavera nos deixaba Victoria Nicolás, «Mariví», a la que li metébanos l’apelliu de lo nombre de la casa en la que viviba en Echo, «de Gastón»
Nacié en Zaragoza en 1939 y de profesión yera mayestra. Con muito interés por la cultura, en los veranos en lo lugar li die por aprender lo cheso, y de allí salieron cuentos, entrevistas a los más viellos de lo lugar en ixes años de los 70 y 80 y, más a más, poemas y versos, que empecipié publicando en lo programa de las Fiestas de setiembre, lo primero en 1982. Tamién publiqué en la revista Fuellas, ya en lo numero 2, en Rolde y en Jacetania. Participé en lo concurso literario Val d’Echo con prosas, los cuentos «La selva feliz» y «Los escalerons de Roldán», con los que gané los Onsos de Plata en prosa en 1982 y 1983. Tamién, en 1985, recibié mención especial en lo premio Ana Abarca de Bolea de lo Gubierno de Aragón con lo poemario Plevia grisa.
Podemos escuitar poemas de Marivi con la suya voz puchando aquí.
Toda la suya obra poetica la replegaría la editorial Xordica en lo libro titulau Plevias, que se presenté en la Val en 2010 en un acto en lo que s’amostré lo pilar que yera la suya literatura pa la nuestra fabla: los crianzons de la escuela reciteron muitos poemas suyos, tan musicals, Trueque Teatro nos trayé bella lectura dramatiza y lo Grupo Val d’Echo int erpreté las cancions musicadas por Pepe Lera con la letra de los poemas suyos, como «Soniando» (nana), «Chicotón, retuno» (La Zagala) y «L’albada» (Otra puerta). Y los vecinos faciemos de la ocasión un reconocimiento y un GRACIAS por lo suyo buen fer. Poco dimpués tornaría bel día pa aduyar-nos en las chornadas Vivindo en cheso que se feban pa acomboyar a estudiants d’aragonés de la capital que nos visitaban, u con ocasión de las Chornadas sobre la obra literaria de la suya amiga Rosario Ustáriz, con la que tantos debates y estudio de la nuestra lengua compartié. En ixos días, en ixas ocasions, se torné a pasiar por las carreras de lo lugar con la suya sonrisa, s’achuntaba en las terrazas con las amigas d’en tiempos y prexinamos que estié feliz de pasar ixos ratos en la Val a la que li heba dedicau tanto afán.
En 2016, lo Gubierno d’Aragón premiaba tanto triballo e iniciativa con lo «Premio Chuana Coscujuela» en la suya primera edición ex aequo con Inazio Almudevar, un reconocimiento por la dignificación y difusión de l’aragonés.
Antiparte Pepe Lera pa lo Grupo, Roberto Serrano con La Orquestina del Fabirol componié en canción «Faga yoga en Fago». Y los suyos poemas siguen inspirando a artistas hoi en día: Luis Pedro Bráviz componié pa coral «Luna», Ester Vallejo incluirá en lo suyo disco venidero una canción con lo poema «La estrela» y Natalia Oñate adrecé «Solas caminan» con otros versos suyos pa componer un corrido.
Nos dexé Marivi esta primavera, zarraba los güellos pa siempre, pero lo suyo legau se quedará entre nusotros pa cutio.
A l’alba me’n iré,
sin de precura,
cuando la nuey se rinda
a la blancura,
cuando la luna, cansa,
se retira
y los gallos li cantan
a la vida.