La organización d’un taller formativo estié la sincusa pa empentar l’adrezo parcial de los tantonicos de la plazoleta debant de la ermita d’Escagüés. No se sabe muit bien cómo, una nueit de nevascos los tantonicos de buena parte d’uno de los paños, en do ibi-era lo disento que se clama «nugo de Salomón», brinqueron dixando una foratera no chiqueta vacía de dibuxo.

Lo taller s’encargué a Amara Carvafal, mayestra artesana especializada en estos patios y que triballa por toda España. Ocho personas s’apunteron de fuera y otras ocho de lo lugar estieron allí un cabo semana de chunio aduyando a replegar pedretas de la forma que conviene y unos limpiando, otris picando y lugo fendo lo dibuxo que yera menester.

No die tiempo a fer las lagunas más chiquetas, que se consolideron por agora con mortero y la idea ye acabar-las este hibierno.

La plazoleta resulté estar millor conservada de lo que pareceba, pero lo primero de los tres panyos grans en los que ye repartida se i veye que ha sufriu más adrezos que li han desfigurau lo dibuxo orichinal, que será más difícil de restaurar.

Lo cuadro debant de la puerta leva lo nugo de Salomon nombrau, que viene de los tiempos de los mosaicos romanos y  s’empleé muito en lo romanico. Lo d’en meyos una flor y lo primero plegando, como decíbanos, ha un dibuxo muit desfigurau por apaños feitos de cualisquier manera. Una greca más chiqueta, con tres cuadros tamién y cerclos en cada uno, da la bienvenida en plegando ta la placeta.

Estos patios tan triballaus soleban estar a cubierto, por lo ye de prexinar que la ermita hese en tiempos un porche u lonja. Tamién, en la misma puerta pasa cuasi desapercibiu los numers 1727 u 1707, no se leye bien. Que podría estar l’año en lo que este patio de tantonicos se facié.

En Echo quedan agún patios polius y bien conservaus, como la sexafolia de casa Don Pascual, u los dibuxos variaus de casa L’Aduana, de casa Don Felipe y de casa Molinero. Otros no fan figuras pero sí se conservan bien, como lo de casa Alfaro u lo de Canteret. En Embún destaca por bien poliu lo de casa Organero. Y tamién  destacan los suelos de las ermitas de Catarecha (Urdués) y Sant Miguel (Embún) y la nuestra lonja en la ilesia de Sant Martín, tamién a cachos muit mal restaurada, pero que conserva un buen paño de las figuras que se pueden trobar en castiellos como lo de Larrés.